Arkitekti Andi Papastefani është duke skicuar Tiranën e harruar, atë që sot fshihet nga ndërtesat shumëkatëshe dhe ndërtimet e shumta pa kriter. Në këtë numër, po botojmë pak vizatime të tij, bashkë me një sqarim, ku ai flet për një teknikë ndërtimi, me të cilën identifikoheshin shumë objekte në Tiranë.
“Nga vitet ’30 filloi të përdoret një teknikë e thjeshtë por rezistente, siç e tregoi koha e betonit me granil të çukitur.
Guri i Shallvares, muri i ulët që rrethonte Parkun “Rinia” e muri që rrethonte lulishten e zhytur pas Skënderbeut ishin me këtë material, që sot janë zhdukur ose zëvendësuar.
Muri mbrojtes i shkallës tek Stacioni i vjetër i Autobuzëve, pas Bashkisë ka mbijetuar deri më sot, dhe është realizuar prej këtij materiali.
Gjithashtu kolona si tek ndërtesa në Rrugën e Kavajës dhe shkalla tek ministritë janë realizuar me një teknikë të tillë”.